Fréttir

Aðalfundi lokið

Þorbjörg Þorvaldsdóttir kjörin nýr formaður

Aðalfundur Samtakanna ’78 fór fram í dag, sunnudaginn 3.
mars. Fundurinn kaus sér nýjan formann, nýja stjórn, nýtt trúnaðarráð, fór í
gegnum fjárhagsáætlun ársins 2019, breytti lögum félagsins, samþykkti
ársreikninga 2018, samþykkti umhverfis- og jafnréttisstefnu,
sjálfboðaliðastefnu og að lokum var aðgerðaráætlun gegn ofbeldi kynnt, en nánar
verður unnið að henni á næstu vikum.

Þorbjörg Þorvaldsdóttir var ein í kjöri til formanns og var hún því sjálfkjörin, ásamt henni voru kosin í stjórn Marion Lerner, Rósanna Andrésdóttir  og Sigurður Júlíus Guðmundsson, en fyrir eru í stjórn þeir Unnsteinn Jóhannsson og Rúnar Þórir Ingólfsson sem voru kjörnir til tveggja ára á síðasta aðalfundi. Tíu einstaklingar voru kosin í trúnaðarráð, þau eru: Agnes Jónasdóttir, Anna Eir Guðfinnudóttir, Bjarndís Helga Tómasdóttir, Edda Sigurðardóttir, Einar Þór Jónsson, Elísabet Rakel Sigurðardóttir, Erlingur Sigvaldason, Nicholas Pfosi, Sigtýr Ægir Kárason og Særós Rannveig Björnsdóttir.

Tvö félög voru samþykkt sem hagsmunafélög Samtakanna ’78, það eru Trans vinir – Hagsmunasamtök foreldra og aðstandenda transbarna og ungmenna á Ísland, og Ásar á Íslandi.

Þorbjörg tekur við formannsembættinu af Maríu Helgu
Guðmundsdóttur sem hefur verið formaður Samtakanna ’78 frá 2016.

Þorbjörg lauk BA-prófi í almennum málvísindum frá Háskóla
Íslands árið 2015 og MA-prófi í málvísindum frá Leiden University í Hollandi.
Hún stundar nú doktorsnám í íslenskri málfræði við Háskóla Íslands. Meðfram
námi hefur hún starfað við aðhlynningu aldraðra, sem barþjónn,
móttökustarfsmaður á hóteli og flugfreyja. Þorbjörg hefur setið í stjórnum
nemendafélaga (Skólafélags Menntaskólans í Reykjavík og Mímis, félags stúdenta
í íslenskum fræðum) og í framkvæmdastjórn Ungra jafnaðarmanna. Þorbjörg er
kvænt Silju Ýr S. Leifsdóttur lífeindafræðingi og eiga þær eina dóttur,
Valbjörgu Maríu tveggja ára. Þorbjörg er tvíkynhneigð.

„Samtökin ‘78 eru ein allra mikilvægustu félagasamtök á Íslandi.
Á fjörutíu ára sögu félagsins hafa lífsgæði og réttindi hinsegin fólks tekið
algjörum stakkaskiptum. Þökk sé þrotlausri baráttu búum við nú við lífsgæði sem
voru nánast óhugsandi þegar Samtökin ‘78 voru stofnuð. Lagaleg staða okkar er
ekki fullkomin – en mun betri – og það sem hefur kannski hvað mest áhrif á
okkar daglega líf – almenningsálitið – er með okkur í liði. Það er ekki
eftirsóknarvert að vera fordómafullur gagnvart hinsegin fólki í íslensku
samfélagi nútímans. Þetta þýðir ekki að Ísland sé einhver hinsegin útópía; að
við höfum náð fullkominni hinsegin fullkomnun og lifum í besta heimi allra
heima. Því ofbeldi og mismunun gegn hinsegin fólki á Íslandi er staðreynd. En
stundum er okkar helsta vandamál það að fólk áttar sig ekki á því hvenær það er
fordómafullt og hvenær ekki.“

Sagði Þorbjörg í ræðu eftir að hún tók við embætti sem formaður Samtakanna ’78.

Fundargerð fundarins.