Viðburður

Kynjaþing 2018

Kynjaþing er lýðræðislegur og femínískur vettvangur fyrir almenning. Dagskrá þingsins er skipulögð af félagasamtökum og grasrótarsamtökum og hugmyndin er sú að auka samræður milli okkar sem er annt um jafnrétti í heiminum og gefa almenningi tækifæri til að kynnast því helsta sem er að gerast í femíniskri umræðu.

Ókeypis aðgangur er að kynjaþingi og öll velkomin.

Fjöldamörg samtök standa fyrir viðburðum á Kynjaþingi: Aflið, B.A.C.A – Bikers Against Child Abuse, Blátt áfram, Femínstafélag HÍ, Femínísk fjármál, Kvenfélagasamband Íslands, Kvennahreyfing Viðreisnar, Kvennahreyfing ÖBÍ, Kvennaráðgjöfin, Kvennasögusafn Íslands, Kvenréttindafélag Íslands, Landssamband Sjálfstæðiskvenna, #metoo hópur kvenna af erlendum uppruna, Myndin af mér, Rótin, Samtök launafólks: ASÍ, BHM, BSRB og KÍ, Samtök um kvennaathvarf, Samtökin ’78, Soroptimistasamtök Íslands, Stelpur rokka!, Stop the Traffik: ACT Iceland, Stígamót, Tabú, W.O.M.E.N. in Iceland, og WIFT á Íslandi.

Dagskráin er fjölbreytt. Á þinginu er fjallað um #metoo byltinguna frá ýmsum vinklum, rætt um mansal, rætt um nýjustu rannsóknir í ofbeldi á Íslandi, fjallað um femínísk stjórnmál og kvennasögu, kynjuð fjármál, fatlaðar konur, kyn og hinsegin fræði, stöðu kvenna af erlendum uppruna, karla og jafnrétti, konur og fíkn og margt, margt fleira.

Á þinginu verða einnig sýndar kvikmyndir: Myndin af mér eftir Brynhildi Björnsdóttur og Þórdísi Elvu Þorvaldsdóttur, Munda eftir Tinnu Hrafnsdóttur, Regnbogapartý eftir Evu Sigurðardóttur sem vann Edduverðlaunin 2016 og videolistaverkið „Setjast að“ eftir írsk-íslenska listakonu Sinéad McCarron. Femínískt kaffihús verður rekið í Tækniskólanum á meðan þinginu stendur þar sem þátttakendum gefst tækifæri á að spreyta sig á femínísku hannyrðapönki, og þinginu lýkur á Shirley Temple partíi fyrir þátttakendur og gesti!

Nánari dagskrá Kynjaþings er að finna á síðunni: http://kynjathing.is/dagskra.