Þorbjörg Þorvaldsdóttir

Fornafn: Hún

Þorbjörg Þorvaldsdóttir er formaður Samtakanna ’78 og hefur gegnt embættinu frá árinu 2019. Áður var hún ritari félagsins tímabilið 2018-2019 og í trúnaðarráði árið 2015. Þorbjörg er fædd árið 1990 og er málfræðingur að mennt. Hún lauk BA-prófi í almennum málvísindum frá HÍ 2015 og MA-prófi í málvísindum frá háskólanum í Leiden 2017.

Hún var rannsóknarmaður og síðar doktorsnemi í íslenskri málfræði við HÍ 2017-2019 og kennir nú íslensku í Víðistaðaskóla. Samhliða námi hefur hún starfað sem flugfreyja, barþjónn, móttökustarfsmaður og við aðhlynningu aldraðra.

Þorbjörg hefur búið víða, m.a. Hollandi, Danmörku og Hondúras, en er að mestu uppalin í Garðabæ og býr þar nú. Hún er gift Silju Ýr S. Leifsdóttur og á með henni tvær dætur fæddar 2016 og 2019.

Þorbjörg er mikil áhugamanneskja um kaffi og drekkur ótæpilegt magn af þeim góða drykk á degi hverjum. Hún elskar einnig góðan bjór, hlátursköst, ljóð og málfræðilegt kyn. Þorbjörg skilur ekkert nema stöngulinn eftir þegar hún borðar epli og talar (að eigin mati) mjög sannfærandi blandínavísku.

Senda erindiFacebookTwitterInstagram