Samtökin ’78 í samvinnu við Árnastofnun kynna:

Hýryrði 2020

Hvaða orð vantar okkur?

Eins og öll tungumál þróast íslenskan í sífellu og aðlagast samfélagi hvers tíma. Orð hverfa úr almennri notkun á sama tíma og nýyrði verða til. Okkur í Samtökunum ‘78 er umhugað um að geta talað um veruleika okkar á íslensku. Á sama tíma þekkjum við mikilvægi þess að hafa eitthvað að segja um þau orð sem eru notuð um okkur. Hér má sjá nokkur dæmi um hugtök sem ljóst er að vantar í málið okkar:

Um Hýryrði 2020?

Hýryrði 2020 eru byggð á sömu hugmynd og fyrri hýryrðakeppni Samtakanna ’78, en hún var haldin árið 2015. Í þeirri keppni urðu m.a. til orðin eikynhneigð, dulkynja og flæðigerva. Á fimm árum hefur ýmislegt breyst og nýjar aðstæður krefjast nýrra orða. Við leitum því aftur til samfélagsins til að aðstoða okkur við að þróa tungumálið.

Þegar við höfum fengið tillögur til okkar munum við fara yfir þær í samstarfi við Stofnun Árna Magnússonar í íslenskum fræðum og að sjálfsögðu leitast eftir áliti þeirra hópa innan hinsegin samfélagsins sem orðin varða beint. Í lok verkefnisins gerum við ráð fyrir því að geta mælt með ákveðnum orðum og vonum í kjölfarið að þau nái flugi í málsamfélaginu, líkt og mörg orð Hýryrða 2015 hafa nú þegar gert.

Fá nánari upplýsingarHýryrði 2015

Taktu þátt hér að neðan!

  • Nafnorðin kona og karl vísa til fólks sem er karlkyns og kvenkyns. Hvað með þau sem eru kynsegin? Hvaða nafnorð dettur þér í hug?
  • Nafnorðin stelpa og strákur (stúlka og drengur eða telpa og piltur) vísa til fólks sem er ungt og karlkyns eða kvenkyns. Hvað með þau sem eru ung kynsegin? Hvaða nafnorð dettur þér í hug?
  • Nafnorðin ekkja og ekkill vísa til fólks sem hefur misst maka. Nafnorðið er til bæði fyrir konur (ekkja) og karla (ekkill). Hvað með þau sem eru kynsegin og hafa misst maka sinn? Hvaða nafnorð dettur þér í hug?
  • Nafnorðin mágur og mágkona vísa til fjölskyldutengsla fólks. Mágur er karlmaður þannig tengdur þeim sem talar eða rætt er um (karli eða konu) að hann er bróðir maka hans, háns, hennar eða kvæntur systur hans, háns, hennar. Mágkonu er lýst á sama hátt - kona þannig tengd þeim sem talar eða rætt er um (karli eða konu) að hún er systir maka hans, háns eða hennar eða gift bróður hans, háns eða hennar. Hvað með þau sem eru kynsegin, hvað gætu þau heitið? Hvaða nafnorð dettur þér í hug?
  • Líkt og nafnorðin mágur og mágkona vísa svili og svilkona til fjölskyldutengsla fólks. Svili er karl kvæntur systur maka þess sem talar eða talað er um og svilkona er kona gift bróður maka þess sem talar eða talað er um. Hvað með kynsegin einstaklinga? Hvaða nafnorð passar?
  • Skrifaðu hér inn, allt sem þér dettur í hug!