Ég er rúmlega fimmtugur tvíkynhneigður karlmaður sem bý í Hafnarfirði ásamt eiginkonu og tveimur börnum, köttum og kanínu. Ég er óttalegur nölli um allskonar hluti – m.a. vísindaskáldskap og fantasíubókmenntir, júróvisjón, Star Trek/Wars (já það má bæði), Superman, tækniþróun og tunglferðir – og veit fátt betra en að sökkva mér ofan í góða bók í friði og ró, helst með malandi kött í fanginu.

Ég er sagnfræðingur að mennt, kenndi unglingum í Seljaskóla í Breiðholti í tíu ár og starfaði svipað lengi í stjórnmálum sem aðstoðarmaður á Alþingi og í ráðuneytum. Um tíma rak ég svo eigið almannatengslafyrirtæki en síðan 2018 hef ég gegnt starfi framkvæmdastjóra Samtaka ferðaþjónustunnar. Ég hef því langa reynslu af því að starfa með fólki og við allskonar mannleg samskipti, en í þannig umhverfi uni ég mér best því þar lærir maður yfirleitt mest um sjálfan sig. Ég reyni að læra eitthvað nýtt á hverjum degi og finnst mikilvægt að finna að það sem ég er að fást við í vinnu og félagsstarfi skipti máli.

Þótt störf mín hafi ítrekað otað mér í fjölmiðla að ræða misskemmtilega hluti er ég minna leiðinlegur en margir halda ( það er mikilvægt að minna reglulega á þetta), almennt viðræðugóður og hef gaman af að kynnast nýju fólki. Ég hvet öll sem vilja kynnast mér betur eða spyrja mig um eitthvað til að hafa samband, t.d. á fb (@johannesthor), nú eða bara hringja og spjalla (s. 6909414).

Ég hef setið í stjórn Samtakanna ’78 síðastliðin tvö ár og það hefur verið mjög gefandi starf. Bæði er ég þakklátur fyrir að fá að leggja mitt á vogarskálarnar en aðallega finnst mér magnað að fá að upplifa hvað samtökin halda úti ótrúlega öflugu starfi á víðum grunni. Þessi tvö ár og þátttaka í ýmsum viðburðum og viðtölum á opinberum vettvangi sem opinber og óopinber fulltrúi Samtakanna og hinsegin samfélagsins, hafa staðfest fyrir mér hvað það skiptir miklu máli að hinsegin fólk á ólíkum stöðum í samfélaginu sé tilbúið að vera sýnilegt og taka sér opinberlega stöðu með málstaðnum. Ef ég sem hef haft rödd í opinberri umræðu í næstum tuttugu ár, er ekki tilbúinn að standa upp og taka til máls fyrir samfélagið mitt og barnanna minna, hver á þá að tala fyrir mína hönd?

Ég hef langa reynslu af allskonar félagsstarfi, t.d. í stjórnum stéttarfélaga og íþróttafélaga, í grasrótarhreyfingum, stjórnmálaflokkum og kórum. Í dag ber ég ábyrgð á rekstri og starfsemi stórra félagasamtaka, þar á meðal fjármálum þeirra, markaðsstarfi og samskiptum við stjórnvöld og fjölmiðla. Ég þekki því hve mikilvægt er að stjórn og framkvæmdastjóri eigi gott samstarf og að ábyrgð hvors fyrir sig sé skýr.

Til að ná fram nauðsynlegum breytingum í samfélaginu þurfa Samtökin ‘78 að eiga árangursrík samskipti við stjórnvöld. Í þeim efnum hef ég mikla reynslu og þekkingu, úr störfum innan sem utan stjórnkerfisins, sem mig langar að nýta í þágu hinsegin samfélagsins. Þá hef ég einnig unnið í alls konar almannatengslaverkefnum síðustu sautján ár, bæði hér á landi og á alþjóðavettvangi með sumum stærstu PR stofum heims, og hef viðað að mér mikilli þekkingu á því sviði sem ég vil nýta áfram í þágu hinsegin samfélagsins. Ég legg mig allan fram í þau verkefni sem ég tek mér fyrir hendur með áherslu á að ná sem bestum árangri.

Umfram allt hef ég þó trú á Samtökunum ‘78 og því sem þau standa fyrir. Réttindabarátta hinsegin fólks er ekki bara okkur nauðsynleg, heldur gerir hún samfélagið betra fyrir öll.

Mannréttindabarátta er aldrei búin. Við erum að horfa upp á hræðilega áminningu um það um þessar mundir í heiminum í kring um okkur, þar sem sterk pólitísk alda reynir að brjóta hratt niður þann árangur sem við höfum náð á áratugum. Nú er enn mikilvægara en áður að við stöndum þétt saman og stöndum vörð um það sem við höfum áorkað.
Samtökin ‘78 standa í framlínunni í þeirri baráttu sem skjöldur, málsvari og stuðningsnet hinsegin fólks.

Besta vopnið gegn misrétti og fordómum er meiri og ítarlegri þekking almennings á málefnum hinsegin fólks. Fræðslustarfið er því eitt mikilvægasta verkefni Samtakanna, það hefur verið byggt vel upp en það þarf að styrkja enn frekar. Það er mjög stór hluti fólks opinn fyrir því að hlusta og læra og það er hópur sem við þurfum að ná enn betur til.

Það þarf að efla innra starf Samtakanna og auka styrk þeirra sem málsvara hinsegin fólks gagnvart stjórnvöldum enn frekar, en það eru í raun tvær hliðar á sama verkefninu. Því sterkari sem Samtökin eru innbyrðis, þeim mun sterkari verður rödd þeirra út á við. Hér skiptir höfuðmáli að tryggja fjárhagslega framtíð Samtakanna svo hægt sé að skipuleggja starfið og byggja upp til næstu ára.

Þótt verkefnin séu mörg og mikilvæg þá er augljóst að trans fólk er í dag á spjótsoddi mannréttindabaráttunnar og barátta þeirra verður að vera barátta okkar allra, því við vitum öll hvað fylgir í kjölfarið ef hún tapast. Það er ógnvekjandi að sjá nær daglega fréttir af umræðu eða athöfnum fólks á öllum stigum samfélagsins sem vinna gegn því að trans samborgarar þess fái notið eðlilegra mannréttinda og grunnþjónustu og geti lifað við öryggi. Þar reynir verulega á mátt Samtakanna ‘78 og samtakamátt hinsegin samfélagsins, og hann verðum við að virkja. Þetta er barátta sem ég ætla að taka þátt í af öllu afli.

Hinsegin samfélagið á öflugan málsvara í Samtökunum ‘78. Undanfarin ár hafa Samtökin verið áberandi í samfélagsumræðunni, náð árangri gagnvart stjórnvöldum, stóraukið fræðslustarf, þjónustu og ráðgjöf og sýnt ráðandi öflum mikilvægt aðhald. Samtökin hafa styrkt samstarf sitt við stjórnsýsluna, sveitarfélög og atvinnulíf og sýnt í verki að þau eru ein mikilvægustu mannréttindasamtök landsins.

Samtökin ‘78 eru rödd okkar út á við og styrkur okkar inn á við og það er gríðarmikilvægt að allt regnbogasamfélagið eigi þar eitt sameiginlegt heimili. Ég trúi því að barátta hvers hóps innan hinsegin samfélagsins sé barátta okkar allra. Við þurfum ekki að vera sammála um allt en það skiptir máli að við séum sterk og sameinuð út á við. Þannig náum við árangri og þannig vil ég vinna fyrir Samtökin ‘78 og fyrir hinsegin samfélagið allt.