Á opnunarhátíð Hinsegin daga síðastliðinn fimmtudag afhentu Samtökin ´78 mannréttindaviðurkenningu sína. Sú viðurkenning er afhent þeim sem lagt hafa þungt lóð á vogarskálarnar til að auka mannréttindi, sýnileika, skilning, fræðslu og mannvirðingu hinsegin fólks í íslensku samfélagi.
Líkt og undanfarin ár voru viðurkenningarnar afhentar í þremur flokkum; „Einstaklingur innan félags“, „Einstaklingur utan félags“ og þriðji flokkurinn sem er „Félagasamtök, fyrirtæki eða stofnun“. Fyrir ári síðan voru teknar upp nýjar vinnureglur er varða val á viðtakendum viðurkenninganna. Framvæmd valsins er sem hér segir:
Að vori er auglýst meðal félagsmanna eftir tilnefningum til viðurkenninganna og óskað eftir rökstuðningi við tilnefninguna. Eftir að tilnefningafrestur er útrunninn fjallar stjórn Samtakanna ´78 og trúnaðarráð um tilnefningarnar og að lokum ganga svo til leynilegra kosninga. Úrslit kosninganna stýra því svo hverjir hljóta viðurkenningu hverju sinni. Aðili sem einu sinni hefur verið tilnefndur verður svo áfram í vali um ókomna tíð því tilnefningalistinn eyðist aldrei. Þannig er reynt að sporna við því að það sem vel er gert gleymist.
Eðli og ástæður slíkra viðurkenninga eru margvíslegar, ekki síst til þess að þakka óeigingjarnt, strembið og oftar en ekki margra ára starf í þágu málstaðarins, en einnig til að vekja athygli á því sem fagmannlega er gert í núliðinni tíð en hefur ef til vill ekki vakið verðskuldaða eftirtekt.
Þó almenn ánægja og gleði hafi ríkt í Háskólabíói að aflokinni glæsilegri Opnunarhátíð voru þó einhverjar óánægjuraddir sem tjáðu vonbrigði með val á viðurkenningahöfum, bæði með hjálp alnetsins og síðar í gegnum einhliða umfjöllun fjölmiðils. Þessar raddir áttu það sameiginlegt að vera andvígar því að mbl-Sjónvarp væri verðlaunað í flokknum „Félagasamtök, fyrirtæki eða stofnun“ og einnig virtust raddirnar byggja rök og skoðanir sínar á misskilningi og hreinlega fara með rangt mál. Samtökin ´78 vilja því nota tækifærið, nú eftir að rykið hefur sest, til þess að leiðrétta þann misskilning sem haldið hefur verið á lofti og til þess að tíunda ástæður vals síns.
Mbl-Sjónvarp og teymið sem stóð að baki gerðar þáttanna „Út úr skápnum“ og „Trans“ hlaut verðlaun fyrir framlag sitt til aukins sýnileika hinsegin veruleika nútímans. Með frumkvæði sínu að framleiðslu þessara vönduðu fræðsluþáttaraða hafa þau ekki aðeins gert hinsegin fólk á Íslandi sýnilegra heldur einnig skapað aðgengilegan vettvang fyrir raddir hinsegin fólks svo þær geti borist hátt og skýrt til þeirra einstaklinga sem enn hýrast í loftlausum skápnum. Að tengja val þetta á handhöfunum Mbl-Sjónvarp við stjórnmálaflokka, fyrrum leiðtoga þeirra, atkvæðasmölun, efnahagshruninu og öðru slíku er ekki annað en fráleit firra og jaðrar við veruleg ósmekklegheit, ekki eingöngu við þiggjendur heldur einnig við veitendur.
Eina pólitíkin sem stjórn og trúnaðarráð Samtakanna stunda er hinsegin pólitík, ekki flokkapólitík. Þannig skiptir engu máli hvar í flokki menn hugsanlega standa ef okkur finnst eitthvað vel gert. Að halda að það sé hægt að veita einstaklingum, sem bíða verðskuldað viðurkenningar, viðurkenningu í flokknum „Félagasamtök, fyrirtæki eða stofnun“ er ekkert annað en hjákátlegur misskilningur á formi viðurkenninganna. Samtökin ´78 standa því staðföst að baki ákvörðun sinni að veita Mbl-Sjónvarpi Mannréttindaviðurkenningu sína fyrir áðurnefndar þáttaraðir og vona að viðurkenningin verði öðrum deildum innan Morgunblaðsins, öðrum fjölmiðlum sem og öllum sem um hinsegin málefni fjalla innblástur að metnaði fyrir faglegum vinnubrögðum, réttri orðanotkun og ómældri virðingu.
Það er von Samtakanna ´78 að hinsegin samfélagið á Íslandi geti áfram barist gegn hatri og fáfræði með ást, virðingu og kærleika að leiðarljósi og að allir geti fundið það í hjarta sínu að gleðjast yfir því sem vel er gert.
