Samtökin '78 bjóða upp á ókeypis ráðgjöf til hinsegin fólks, aðstandenda hinsegin fólks og fagfólks. Fullur trúnaður gildir um ráðgjöfina. Árlega nýta fjölmargir sér þessa þjónustu. Við bjóðum upp á ráðgjöf vegna persónulegra mála, félags- og sálfræðiráðgjöf og einnig lögfræðiráðgjöf. Hægt er að fá einstaklingsviðtöl eða koma fleiri saman, t.d. par, vinir eða fjölskyldur.
Hafðu samband – það er fyrsta skrefið
Hægt er að panta ráðgjöf í síma 552 7878 eða með tölvupósti: skrifstofa@samtokin78.is – fyllsta trúnaðar er gætt. Við bjóðum bæði upp á viðtöl í síma eða viðtöl sem eru tekin í húsnæði okkar að Suðurgötu 3. Húsnæðið er aðgengilegt fyrir fólk sem notar hjólastól.
Ráðgjafarnir eru allir fagmenntaðir. Þeir eru:
- Aldís Þorbjörg Ólafsdóttir, sálfræðingur
- Erna Á. Mathiesen, lögfræðingur
- Guðbjörg Ottósdóttir, félagsráðgjafi
- Sigríður Birna Valsdóttir, leiklistar- og fjölskyldumeðferðarfræðingur
- Todd Kulczyk – leiklistar- og fjölskyldumeðferðarfræðingur
Hvað get ég rætt við sál- eða félagsráðgjafa?
Dæmi um viðfangsefni hjá sál- og félagsráðgjöfum:
- Að koma út sem trans
- Að koma út sem samkynhneigð/tvíkynhneigð/pankynhneigð/asexúal
- Óvissa um kynhneigð eða kynvitund
- Samskipti við fjölskyldu og vini
- Ráðgjöf til skóla og kennara vegna málefna hinsegin nemenda
- Ráðgjöf til fagfólks sem starfar með hinsegin fólki, t.d. hjúkrunarfræðinga eða sálfræðinga
- Fyrstu skrefin sem hinsegin
- Þunglyndi eða kvíði
Hvað get ég rætt við lögfræðiráðgjafa?
Dæmi um viðfangsefni hjá lögfræðiráðgjafa:
- Réttur minn í samskiptum við stofnanir, t.d. Þjóðskrá, Sýslumenn eða Tryggingastofnun
- Réttur minn í skilnaðarmálum
- Réttur minn í forsjármálum
- Mat lagt á hvort um stærra mál er að ræða sem þarfnast dómsmáls
- Aðstoð við fyrstu skref til að leita réttar síns
Nánari þjónustulýsing á félags-, sálfræðiráðgjöf Samtakanna '78:
Almennt um þjónustuna
Samtökin '78, félag hinsegin fólks á Íslandi, bjóða upp á ráðgjöf í formi viðtalstíma. Ráðgjöfin getur farið fram bæði í gegnum síma og í eigin persónu og er fyrir einstaklinga, fólk í samböndum og fjölskyldur. Hægt er að hafa samband við ráðgjafa símleiðis eða í gegnum tölvupóst. Ráðgjafarnir hitta skjólstæðinga sína í ráðgjafaherbergi í húsnæði Samtakanna '78 (þeir hafa eitt herbergi til umráða). Skjólstæðingum stendur til boða að mæta án endurgjalds í allt að þrjú skipti, en að þeim tímum loknum gefst fólki kostur á að mæta í viðtöl gegn greiðslu. Ráðgjafar Samtakanna '78 benda einnig á aðra meðferðaraðila, telji þeir það eiga við – sem og ef fólk leitar eftir því.
Markmið með þjónustunni
Ráðgjöf Samtakanna '78 er fyrst og fremst hugsuð fyrir hinsegin fólk og aðstandendur þeirra og er markmiðið að styðja þennan hóp og auka lífsgæði hans. Ráðgjöfin er öllum opin, félagsmönnum jafnt sem öðrum. Nær allir sem leita til ráðgjafa Samtakanna '78 eiga það sameiginlegt að vera hinsegin eða aðstandendur hinsegin fólks. Flestir eru að takast á við mál sem tengjast kynhneigð eða kynvitund á einhvern hátt. Margir eiga við kvíða, þunglyndi og/eða félagslega einangrun að stríða og einnig geta verið vandkvæði í samskiptum við fjölskyldu og/eða annar vandi. Eins leita fagaðilar og stofnanir til ráðgjafanna um ráð og upplýsingar.
Notendur þjónustunnar
Mjög misjafnt er hver tilgangur fólks er sem leitar til ráðgjafanna. Sumir koma eingöngu vegna hinsegin mála hjá þeim sjálfum eða einhverjum nákomnum, á meðan aðrir leita til ráðgjafanna vegna annarra mála samhliða þeim, vitandi að þeim verður vel tekið og að hinsegin málefni munu ekki flækjast fyrir ráðgjöfinni.
Fólki getur þótt erfitt að leita til fagaðila og ræða sína kynhneigð og/eða kynvitund án þess að vera viss um að sá aðili hafi þekkingu á þessum málaflokkum. Samtökunum '78 hafa borist fregnir frá félagsmönnum sem hafa leitað til ráðgjafa annars staðar og fengið ófullnægjandi þjónustu vegna vanþekkingar á hinsegin málefnum og jafnvel upplifað fordóma. Þetta getur m.a. birst í tilhneigingu meðferðaraðila til að taka ekki tillit til kynhneigðar og/eða kynvitundar. Einnig þekkist það að meðferðaraðili vilji alhæfa, tengja alla líðan við kynhneigð og/eða kynvitund og gera þessar breytur að aðalumræðuefni þótt þær séu það ekki og fólk sé að leita sér ráðgjafar til að ræða allt önnur mál. Einstaklingar sem leita til ráðgjafa hjá Samtökunum '78 eru því að koma inn á öruggt svæði. Þar er kynhneigð og/eða kynvitund þeirra tekið sem sjál
fsögðum og eðlilegum hlut og ekki lagt út af þeim breytum ef það á ekki við.
