Tilkynningar Hópur homma, fjörutíu ára og eldri, hittist að vanda fyrsta föstudagskvöld í mánuði og nú mætum við allir föstudagskvöldið 2. mars í Regnbogasalinn á Laugavegi 3. Húsið opnar klukkan 21.
Gestur kvöldsins er Elías Mar rithöfundur sem ætlar að spjalla um liðna tíð á Laugavegi 11 og fleira forvitnilegt úr Reykjavíkurlífinu frá því um miðja öldina. Elías setur sig í sagnastellingar klukkan 22 og spjallar fram eftir kvöldi, en um miðnætti flytjum við okkur út í næturlífið og látum berast með straumnum á þá bari sem kunna að vera opnir.
