Frettir
Myndir af pyntingum og ómannúðlegri meðferð fanga í Írak hafa á undanförnum dögum vakið óhug um heim allan. Framferði hernámsliðsins, þar sem fangar eru oft á tíðum niðurlægðir kynferðislega, beinist ekki aðeins gegn hefðbundum kynímyndum múslima heldur ber um leið glöggt vitni rótgróinni hómófóbíu í bandaríska og breska hernum. Bæði Rauði krossinn og Amnesty International telja aðfarirnar kerfisbundnar og jafngilda pyntingum.
Meðal fjölmargra pyntingaaðferða sem fregnir hafa borist af virðist kynferðislega niðurlæging hafa verið vinsæl aðferð. Þannig hafa heimsbyggðinni borist myndir af nöktum mönnum sem hrúgað er upp í eins konar píramída hver ofan á öðrum. Aðrar frásagnir hafa borist af mönnum sem neyddir hafa verið til þess að stunda munnmök hver við aðra, fróa sér eða þeim nauðgað með flöskum, burstum og öðrum hlutum – allt undir háðsglósum herlögreglumanna og fangavarða.
Dhia al-Shweiri greindi AP fréttastofunni frá því hvernig hann hefði verið látinn afklæðast og standa boginn með hendur upp við vegg: ?Ég var ekki áreittur kynferðislega, en samt sem áður auðmýktur með þessu framferði. Við erum karlmenn. Það væri skárra ef þeir gengju í skrokk á okkur. Við getum þolað það. En það vill enginn láta niðurlægja karlmennsku sína. Þeir vildu láta okkur líða eins og við værum konur og það er versta auðmýking sem hægt er að hugsa sér?.
Mahdi Bray, framkvæmdastjóri hagsmunafélags múslima í Bandaríkjunum, segir að nekt tengist mikilli skömm í arabaheiminum og að samkynhneigð sé þar að auki talin til alvarlegrar syndar í islamskri trú. Fyrir marga múslima sé það gróf árás á sjálfa trú þeirra og menningu að sjá nakta trúbræður sína neydda til kynmaka og kynferðislegra athafna. ?En hvaða skoðun sem menn hafa á samkynhneigð yfirleitt, þá hlýtur fólk að sjá hversu villimannsleg þessi framkoma er?. Bray bætir því við að hann telji augljóst að þeir sem fyrirskipað hafi pyntingarnar hljóti að gera sér fulla grein fyrir því hversu alvarlegum aukum nekt og samkynhneigð sé litin í araba heiminu og að markmiðið hafi verið að valda sem mestu geðrænu tjóni.
Dr. Aaron Belkin hefur rannsakað viðhorf til samkynhneigðra innan bandaríska hersins. Hann segir að þessi tíðindi spegli djúpstæða hómófóbíu innan hersins: ?Hómófóbía tekur á sig ýmsar myndir innan hersins ? hommar og gagnkynhneigðir geta ekki treyst hver öðrum, samkynhneigðir eru álitnir nauðgarar og samkynhneigð talin geðsjúkdómur ? en frásagnir af pyntingum í Írak sýna hversu ómennska mynd slík fóbía getur tekið á sig. Með því að setja íraska fanga í þessa stöðu er verið að gefa til kynna að samkynhneigðir séu óæðri öðrum mönnum, í rauninni líkastir dýrum?.
-HTS
Heimildir: Washington Blade Online, Morgunblaðið
