Hýryrði 2020
Hvaða orð vantar okkur?
Eins og öll tungumál þróast íslenskan í sífellu og aðlagast samfélagi hvers tíma. Orð hverfa úr almennri notkun á sama tíma og nýyrði verða til. Okkur í Samtökunum ‘78 er umhugað um að geta talað um veruleika okkar á íslensku. Á sama tíma þekkjum við mikilvægi þess að hafa eitthvað að segja um þau orð sem eru notuð um okkur. Hér má sjá nokkur dæmi um hugtök sem ljóst er að vantar í málið okkar:
Karl
Kona
?
Nafnorðin kona og karl vísa til fólks út frá kyni þeirra. Hvað með þau sem eru kynsegin? Hvaða nafnorð dettur þér í hug?
Stelpa
?
Strákur
Nafnorðin stelpa og strákur (stúlka og drengur eða telpa og piltur) vísa til barna út frá kyni þeirra. Hvað með þau sem eru ung kynsegin? Hvaða nafnorð dettur þér í hug?
?
Ekkill
Ekkja
Nafnorðin ekkja og ekkill vísa til fólks sem hefur misst maka. Nafnorðið er til bæði fyrir konur (ekkja) og karla (ekkill). Hvað með þau sem eru kynsegin og hafa misst maka sinn? Hvaða nafnorð dettur þér í hug?
Mágkona
Mágur
?
Mágur/mágkona er karlmaður/kvenmaður þannig tengdur þeim sem talar eða rætt er um (karli eða konu) að hann/hún er bróðir/systir maka hans, háns, hennar eða kvæntur systur/bróður hans, háns, hennar. Hvað með þau sem eru kynsegin, hvað gætu þau heitið?
Svili
?
Svilkona
Svili er karl kvæntur systur maka þess sem talar eða talað er um og svilkona er kona gift bróður maka þess sem talar eða talað er um. Hvað með kynsegin einstaklinga? Hvaða nafnorð passar?
Ert þú
með aðrar
tillögur?
Þessi listi er alls ekki tæmandi, endilega taktu þátt í Hýryrðum 2020 með því að svara könnuninni.
Fara í könnun
Um Hýryrði 2020?
Hýryrði 2020 eru byggð á sömu hugmynd og fyrri hýryrðakeppni Samtakanna ’78, en hún var haldin árið 2015. Í þeirri keppni urðu m.a. til orðin eikynhneigð, dulkynja og flæðigerva. Á fimm árum hefur ýmislegt breyst og nýjar aðstæður krefjast nýrra orða. Við leitum því aftur til samfélagsins til að aðstoða okkur við að þróa tungumálið.
Þegar við höfum fengið tillögur til okkar munum við fara yfir þær í samstarfi við Stofnun Árna Magnússonar í íslenskum fræðum og að sjálfsögðu leitast eftir áliti þeirra hópa innan hinsegin samfélagsins sem orðin varða beint. Í lok verkefnisins gerum við ráð fyrir því að geta mælt með ákveðnum orðum og vonum í kjölfarið að þau nái flugi í málsamfélaginu, líkt og mörg orð Hýryrða 2015 hafa nú þegar gert.