Frettir Hinn 28. september s.l. samþykkti þjóðþing Finnlands með 99 atkvæðum gegn 84 lög um staðfesta samvist fyrir pör af sama kyni. Lögin eru í meginatriðum eins og löggjöf hinna Norðurlandanna á þessu sviði. Þó öðlast pör i staðfestri samvist í Finnlandi ekki rétt til ættleiðinga neins konar.
Mikill mannfjöldi hafði safnast saman fyrir framan þinghúsið í Helsinki þennan dag eða yfir þúsund manns. Bar þar mikið á mótmælum trúarofstækishópa en einnig var fjöldi stuðningsmanna frumvarpsins á staðnum.
Öll önnur þjóðþing sjálfstæðra Norðurlandaþjóða hafa áður samþykkt löggjöf um staðfesta samvist og er Finnland því síðast í röðinni til að veita samkynhneigðum borgurum þessi réttindi. Danmörk var fyrst í röðinni 1989, síðan Noregur 1993, Svíþjóð 1995 og Ísland 1996. Einungis Ísland og Danmörk leyfa svokallaðar stjúpættleiðingar í staðfestri samvist, en umræður eru heitar í Svíþjóð um þessar mundir um það hvort leyfa eigi pörum í staðfestri samvist að ættleiða börn. Önnur ríki sem sett hafa lög um staðfesta samvist eru Holland, Frakkland, Belgía og Þýskaland. Í Hollandi hefur einnig verið sett löggjöf um að samkynhneigðir geti gengið í hjónaband með fullum réttindum, þ.m.t. rétti til ættleiðinga.
RFSL Homoplaneten; Huvudstadsbladet; Nya Åland
