Skip to main content
Fréttir

Velheppnað hátíðarkaffi

By 5. júlí, 2011No Comments

Mánudaginn 27.júní var opið hús og hátíðarkaffi í félagsmiðstöð Samtakanna 78. Það var fullt af fólki sem kíkti við og fagnaði því að fyrir 15 árum gengu í gildi lög um staðfesta samvist, en þau voru afrakstur mikillar vinnu meðal annara Samtakanna 78.  Þessi lagasetning var upphafið að röð lagabreytinga sem náðu ákveðnum hápunkti í fyrra þegar ein hjúskaparlög fyrir alla gengu í gildi.  27.júní minnumst við líka Stonewall uppreisnarinnar sem varð í New York 1969 og kom skriði á réttindabaráttu okkar hinsegin fólks.   

Formaður þakkaði fyrir gjafir sem félaginu hafa borist en þær eru; 

vegleg bókagjöf úr dánarbúi Ingibjargar Ólafsdóttur, 

peningjagjöf sem var afrakstur minningartónleika um Örn Washington en þær Anne Kristine Magnúsdóttir og Andrea Jónsdóttir stóðu fyrir þeim, 

þá gaf Hilmar Magnússon ásamt móður sinni píanó til samtakanna sem mun vonandi koma að góðum notum við uppákomur í Regnbogasalnum. 

Þá er aldrei að vita nema núna verði loksins af stofnun hinsegin kórsins sem oft hefur verið rætt um að stofna. 

 

Þá var tilkynnt hverjir hljóta Mannréttindaverðlaun Samtakanna 78 í ár og eru það eftirtaldir aðilar:

Í flokknum Hópur, félag eða fyrirtæki: HIV-Ísland, Alnæmissamtökin.  Þegar alnæmisfaraldurinn kom upp þurftu yfirvöld allt í einu að fara að ræða við félög tengd samkynhneigðum/hinsegin fólki um viðbrögð við þessari ógn. Fyrst voru það Samtökin 78 en seinna Alnæmissamtökin en þau voru stofnuð 1988 til að auka þekkingu og skilning á alnæmi og að styðja sjúka og aðstandendur. Á síðasta ári smituðust 5 samkynhneigðir og viljum við þessvegna hvetja HIV-Ísland, Alnæmissamtökin og samfélagið okkar allt til að leggjast á eitt með okkur og auka fræðslu og meðvitund um varnir. 

Í flokknum einstaklingur utan félags: Dr.Sigrún Sveinbjörnsdóttir lektor við Háskólann á Akureyri. Hún hefur skrifað fjölmargar greinar og sinnt rannsóknum á högum hinsegin fólks auk þess að hvetja nemendur sína til þess sama. Þannig hefur hún krufið samfélagið okkar og bent á aðstæður hinsegin fólks. Hún er stofnfélagi í FAS-N, foreldra og aðstandendafélagi samkynhneigðra á norðurlandi og virk enn þann dag í dag í starfinu fyrir norðan.

Í flokknum einstaklingur innan félags: Páll Óskar Hjálmtýsson, óþrjótandi talsmaður hinsegin fólks og hefur haft mikil áhrif á afstöðu almennings til hinsegin fólks. Hann er skemmtikraftur sem höfðar til fólks frá 5 ára til tíræðs eins og sjá mátti glöggt á tónleikum með Sinfóníuhljómsveit Íslands fyrst í Háskólabíó og svo í Hörpu núna á vormánuðum.  Hann nær til fjöldans með hispurslausri og einlægri framkomu og vekur athygli á málefnum okkar hvar sem hann kemur. 

Mannréttindaverðlaunin verða svo afhent formlega á opnunarhátíð Hinsegin daga í Háskólabíó 4.ágúst næstkomandi. 

 

Að þessu loknu tóku svo Margrét Eir og Gísli Magnason þrjú lög fyrir gesti og vígðu þar með píanóið góða.  

Stjórn þakkar öllum sem aðstoðuðu við undirbúning hátíðarkaffis og öllum gestunum fyrir komuna 

Leave a Reply